(1861 – 1928)
Մերի Էլլեն Ռիչմոնդը ծնվել է 1861 թվականի օգոստոսի 5-ին ԱՄՆ–ի Իլլինոյս նահանգի Բելլեվիլ քաղաքում: Ծնողների մահից հետո երեք տարեկան հասակում նրան ուղղարկել են Մերիլենդ նահանգի Բալտիմոր քաղաք տատիկի և հորաքույրերի մոտ: Մինչև 11 տարեկանը տանն է կրթվել, հետո հաճախել է Կանանց հարավային դպրոց, որն ավարտել է 1878 թվականին: Ավարտելուց հետո հորաքրոջ հետ մեկնել է Նյու Յորք, որտեղ աշխատել է գրքերի հրատարակչությունում: Այնուհետև 1889 թվականին ստանձնել է Բալտիմորի Բարեգործական հասարակության գանձապահի օգնականի պաշտոնը, որտեղ հնարավորություն է ստացել շփվել Ջոն Հոպկինսի համալսարանի բժշկական ֆակուլտետի դասախոսների և ուսանողների հետ, որոնք այդ կազմակերպությունում աշխատում էին որպես կամավորներ: 1891 թվականին Մերի Ռիչմոնդին նշանակել են Բարեգործական հասարակության գլխավոր քարտուղար, որտեղ աշխատել է տասնութ տարի:
Մերի Ռիչմոնդի նախաձեռնությամբ 1898 թվականին իր գործունեությունն է սկսել Կիրառական ֆիլանտրոպիայի առաջին ազգային դպրոցը: Նա 1909 թվականին նշանակվել է Նյու Յորքի Բարեգործական կազմակերպության տնօրեն:
Մերի Ռիչմոնդը հանդիսանում է սոցիալական աշխատանքի հիմնադիրներից մեկը: Նա առաջինն էր, որ սոցիալական աշխատանքի մասնագետների պատրաստման համար դպրոցներ էր բացել: Նրա ներդրումը սոցիալական աշխատանքի կայացման մեջ կապված է տեսության և պրակտիկայի մեջ գիտական մոտեցումների հիմնման հետ: 1921 թվականին Նյու Յորքի քոլեջում նրան տրվել է հումանիտար գիտությունների պատվավոր մագիստրոսի կոչում` նոր մասնագիտության` սոցիալական աշխատանքի գիտական հիմքերի մշակման համար:
Սոցիալական աշխատանքի ոլորտում նրա առավել հայտնի աշխատություններն են`
- ‹‹Ընկերական այց աղքատներին. ուղեցույց բարեգործական կազմակերպություններում աշխատողների համար››,
- ‹‹Սոցիալական ախտորոշում››,
- ‹‹Դեպքի հետ սոցիալական աշխատանք››:
Մերի Ռիչմոնդը մահացել է 1928 թվականին:
